eK! is electronic Kabalen, a web-exclusive Kapampangan journal of ideas

papa osmubal
oscar balajadia DENING QUECATAMUNG maiaiaus uatas magugulu la! Piguguluan da nung ninung tutuqui rang putungan o pasuluran bulung laurel queng malingmingan a ala naman calaman-laman. Nung atin cang laman a buntuc, misip ca. Calagua na ning mimisip, o't e ra aguiung gauan dening quecatamung masasabing uatas a pa-laurea-laureadu (e tutung laureadu o e tutung uatas)? Nanung masanting da nang sinulat dening uatas a reni? Ala. Capilan man e la munlad a paniulat deni. Mangatua na la, at nung micamasanting la mung sinulat malambat na sa'ng miliari, ania pa sa'ng caianac-anacan da. Ngeni gagamitan da na mu ing quelan-marine ampo ing pera ra ba lang manicuang galal o papuri, calupa na nining laurea-laureadung pipapapaten da't macaialingongo carening abe ra.

Nung matni la buntuc deni cutang da: Pilan lang laureadu queng Pampanga? At pilan la reng uatas? At pilan ing cailangan tamung laureadu at nanung papil da't catungculan a dapat gauan? Casican ning quelan camarinaian queng bangsa tamo. Isipan mu na dacal la pa reng poeta laureadu tamu quesa careng taganang maiaiaus matinung poeta o uatas! Dapat lang dumine uli'ng ing tutu na dacal la pa reng laureadu quesa carening matinung uatas a e pacalto't pacasalicut dugu. O't e la mimisip? O't cautac lang biang anti canini?

Queta pang minunang panaun asna nong caracal dening mesabing laureadu. Dapuat ining mesabing galal dacal ne pinsalang depat queng calinangan tamu't camarinaian. Antalu reng gaua ra't paniulat? Ala. O macanano sinulat la mu't pemaquit da la careng cacaluguran da—at dening cacaluguran dang deni ila mu naman deng memili't memalaguiung laureadu carela. E macarine? Nu' la reng sinulat da? Atin mapilan a mililele at ababasa ta la pa angga ngueni, dapuat asabi mung ditac la careni reng asabi mu't aiaus cauatasan. Dapuat dacal la pa reng meiaus laureadu quesa carening misulat o mecudtang cauatasan? Guinu cung mamacalulo, malambat cu nang sasabian ini at paulit-ulit cung sasabian anting sirang placa—e maiap ining daraptan tamung ini, e ia maiap ining galal a laurea-laureadung ini, ania tucnangan ta ne't calinguan! Menaquit na cang miguit la pa racal deng laureadu quetang milabas quesa careng sinulat dang cauatasan? Nu' la reng cauatasan da? Ala. Ala cang aquit. Manaquit ca man, pipilan la reng masalese pangasulat at carapat-dapat matunggue sinulat ning metung a laureadu. Ining panugali ampong casanaian a iti dapat nang maputut at mitucnang. Camulangan ini't cabalbalan at dapat nang maulu ba nong sumulat at misip dening baiung alput a talasulat queng Capampangan. Balamu reng maue-ue quecatamu, isipan mu nang asnong caracal deng mangarinan papuri't parangal, ala ta naman acaquit misusulat masalese't matunggue caiamanan ning calinangan? Ai, anac ning alting picbungan! Ai, anac ning alting malutu pitaclan! Ing 'gang cabalbalan iang balu rang gauan—casiran at cacuracutan!

Ining panugali at casanaian a iti a tictac sura't tutung alang dulut a masampat quening calalangan Capampangan—iti, iting camulangan a iti—iti mimiral iang casalungsungan at paparusang alang patugut quening singap-singap tamung paniulat Capampangan. Iti balu ra reng macasariling talasulat (dening papabalung laureadu la), dapuat ing sisesen da ing quelan dang camarinaian at pangsariling guiam at caburian. Pipinpin de ining quecata'ng calinangan at papaten de ining quecatamung paniulat. Ila reng matula't cuntentu quening galal at papuring acacua ra cabang daramusacan de ining quecatamung calinangan. Miparusan la laguiu rening taung deni queng casalesaian. Deni ngan miatulan la queng pamaniaptan dang camulalan at quelan-camarinaian— dening 22 a tatalacad poeta laureadu cunu, dening 22 a poeta laureadu canu, deni cambe ra pa rening tutuquing 6 a putungan dang baiung poeta laureadu, ila ngan miatulan la queng casalesaian. At dapat dang abalu ing maplas ia atul ing casalesaian. Masaquit iang diling atul itang masabi cang mapamirait ampong maclac a buntuc—at iting atul a iti ala neng tacut ilantang at iapag nining casalesaian. Iacu caiantabe que ining casalesaian at iacu balu co ngan laguiu rening papadaquila't papaiaus biasa't baiani at macanian mu naman balu cu nung nanung uring paniulat ining susulat da. Ania caiabe queng miapag queng catutuan ining casalesaian at ipamacarine la ngan dening talasulat a manaco at sisira quening beluan nang macamal nining balaian Capampangan. E co sasalangan queng susulat da, dapuat tututulan cu (tututul cung masican at mapait) queng pamanenaia rang calibe parangal at galal queng sablang susulat da. Samantalang asabi tamung ing quecatamung paniulat bubut ia pa mu't macaba pang panaun ing panaian na baiu ia lulut.

Nanung gauan tamu carening 22 a papaiaus laureadu ning Capampangan? E uari amanuan dang singap-singap ne mu ining amanu't cauatasan Capampangan? O't ngeni pala atin tamung 22 poeta laureadu? Caiabala ra iata't caracal tutung gagauan at cuculang la pa panaun at cuculang pa ing sican da't cabilangan ania ngeni oreni mitipun-tipun la—queng quepalan ning lupa ra—at mamili no na naman canung 6 a baiung poeta laureadu? Anac ning quegana-ganang queclacan buntoc! Nanu na ing agaua ra reng 22 poeta laureadu't ngeni mangailangan la pang casaup ra't o ian manintun lang putungan dang bulung laurel queng malingmingan dang casingcapal ning sablang queclacan buntuc! Nanung gauan tamu carening laurea-laureadu? Angga mu queng cailian ta la't pasisti. Angga mu quetang panupaia ta lang anting anac a mangalati't pibalabalugbug ta na mu ining carelang cabalbalan.

Aduampulu't miguit no rening quecatamung laurea-laureadu, ua, 22, at malapit na mu mabilug nong 28. Metung ia mu ing buri nang sabian at cabaldugan nini—Ing camataian na ning paniulat Capampangan. Magumpisa ngeni ala nang sumulat tagana canini (at ini amana tamu caretang minuna quecatamu a mituring pulitica quening calalangan at calinangan tamu). O ini ing tuturu na ning catutuan a atin tamung 28 a laurea-laureado (at quetang mengalabas-labas cata-cata la naman detang meguing tamung laurea-laureadu)—na ing metung a cabalen sumulat ia uli na mu nitang bisa iang mica-galal ampong maiaus laurea-laureadu. Queng bucas at careng daratang pang panaun, magdusa ia't misaquitan anti canini ing quecatamung paniulat Capampangan, o mengare pegumpisan de reng 'gang mangaclac a buntuc at alang atdu. E ra balu ining pasari ning camulalan dang iti. E la malulunus queng quecatamung paniulat at calalangan Capampangan. Macalungcut, oneng ini ing catutuan, macuiad na'ng pinandit ing anten-anten tamu't aquit ta na ing dulut nining casiran at capamiraitnan a maliliaring iti.

Ing bangsa tamu taganang palbug ne't ala neng pagasa. Samula quening pulitica marinat na, ngeni pelalung ining calingangan dinatan da na naman dugu. Dening talasulat ila dapat deng misip at miligtas queng balen, dapuat e ra gagauan, e la man mimisip. Nung mimisip ca, nung macatau ca, nung macabalen ca, paquisabian mo reng caiabe mung talasulat at sabian mung e na maiap ining maliliari. O't alang macaulata quening maliliaring quelan-camarinaian a ine? O't ala busqui metung man carela ing mimasmas at misilaran aslag caisipan o panimanman at sumabing macapasaring marauac ining pamamutung laureadu queng quecatamung paniulat Capampangan? Ala busqui metung man carela ing atin aslag puso? Ala busqui metung man carela ing matapang sumabing, "Lalaco cu ne't lulucas ining canacung laurel, uli'ng balu cung ala ia man ulaga't cabaldugan"? Ala? Ai, mamacalulung Catulpo, at oren tultulan la pa't saglulung munang miputungan laurel.

Asabi cu na careng minuna cung sinulat dacal a cutang a alang paquibat quening pamamutung laureadu.

Munang-muna, ganap ta na uaring casanting pamaniulat at ngeni carapat-dapat ta nang putungan laurel? Basan ta la reng susulat tamu. At maquiramdam tamu queng siuala ning catutuan a gugulisac o sisitsit careng pilub-luban tamu nung dening susulat tamu carapat-dapat lang purian at ing sinulat carapat-dapat neng ausan laureado. At bilang caragdagan canini, ing laureadu laun neng caisipan at deng macabaiung talasulat e ra ne gagamitan man bitasa. At deng anac-anac ngeni a baiung alsut picarine ra man dugung maiaus lang laureadu (liuas na mu carening mapilan dang aiasag ampong autu rening macatua tamung laurea-laureadu). Ining laurel palatanda ne't pamana ning paurung a beluan quetang milabas. Bisa la't e bisa rening laurea-laureadu tamu mauala ia't lumbug ining aus dang laureadung ini, at malapit nang maliari ita, ania ing masanting dang dapat gauan, pagumpisan de ining pamagbaiung ini at samulan de quening carelang caguiuan at upaia bilang talasulat ba lang maquilalang metung carening migpabaiu't menialese quening calinangan at calalangan Capampangan. Macapagmulala o't quelan dang marine't quelan galudgod, at e ra gagauan iti? Malino iang bague iti, o't e re acaquit?

Cacadua, balamu ining laureadu, e ne man taganang matas a antas o baitang ning panga-uatas ning metung a talasulat queng Capampangan. Balamu ini sasabian na mung miras ne quetang antas nung capilan maliari neng sumulat cauatasan ining talasulat, dapuat e na buring sabian na ining talasulat a miputungan laureadu taganang biasa ne. O mengare andat apapabiasa rang baguiang sumulat cauatasan puputungan dang laurel! Nung uari ing metung a talasulat magsamula iang sumulat, magsane ia, anggga quetang miras ia quetang antas a alagpusan na na ing pamagsane ausan da neng poeta laureadu. Lalto rening 28 a laurea-laureadu na ning Capampangan e la pa taganang ganap a uatas o poeta, nung e talasulat lang milagpus pa mu quetang pamagsane. Ania queng Capampangan nung inaus da cang poeta laureado, ali ia mangabaldugan matas a aus (ali ia tune papuri't carangalan), o e man mangabaldugan taganang "poeta o uatas," ania nung uari ining "poeta laureadu" ning Capampangan antas ia mu nung nucarin ining talasulat sasamasnan na nang baguia-baguia ining susulat nang cauatasan. Nung uari lalto ing laurea-laureadu ning Capampangan metung iang aus da carening bisang sumulat cauatasan. O caia ba ia mung sumulat ining metung a tau, ausan deng poeta laureadu. Nung uari ining aus a poeta laureadu ia ing apan (bait o decoy queng amanung Ingglis) ba lang dumamit at cuminis dening buri rang dumamit at cuminis. Ba la mung atin apatuqui, ba lang dacal dening carelang pulacus. Nung uari ining aus a laurea-laureadu ning Capampangan pamaduas de mu't pamanamuiut. Ing poeta lauredung Capampangan mangabaldugan iang pamagsane pa mu tagana, uli'ng e na papaquit ing catenacan da't cabiasnan dening talasulat. At uli rugung e la taganang talasulat dening queracalan carela aquit mu ing pamagcacasaquit dang susulat at careng paniulat da malagad lang tutu reng ali quimo't ali mabuia talacad. Ing paniulat da (pane maqui-sucad, mababa panalalaue't laun la pa siuala) pase-pase la't uasang-uasang. Balamu e ra man aguiung ibuat at talacaran ining catungculan ning metung a taganang susulat, ini mung galal o papuri ing carelang tatagalan.

Queng malaguang salita, mababo ia mu cabaldugan (o mecad ala ia man dugung bitasang cabaldugan) ining aus a laurea-lauredung ini queng Capampangan at e ne man sasalamin ing malalam a beluan, malulut a calalangan ampong macabaiung caisipan. Ngana ning metung cung caquilalang talasulat, dening laurea-laureadu tamu mengari lang anac a mangalati—e la guniat at sumuiu queng Capampangan nung e mo dinan pa mung galal o nung e mo pa mu ausan laureadu. Salese na! Santing na nining maliliare!

Metung pa, ninu-ninu mu rening matutuldu bilang laureadu. At ninu-ninu mu reng pipili't miaialal carela't cacaluguran da la mu't caquilala. E macatuliran ini uli'ng balu tamung dacal la reng macapinpin a taganang uatas lalu na reng careng liblib at casuluc-sulucan a marangle queng Pampanga a biasa taganang sumulat dapuat deni uli'ng ala lang perang ibaiad (ipaniulsul at panialing galal) at calulu la angga mu rugu queng e la miririnan siaula. O mengare ining bulung a laurel queng datang na balamu ing ausan dang "me-sindicatu"—cauatan la ngan deng mamiling laureadu at cauatan la ngan deng pipilinan dang laureadu. Ila-ila mu. Nung uari tetag do rening aguman da ba la'ng maguing casangcapan queng pamamiling laurea-laureadu. Ania rening e caiabe carening aguman da, e la mapiling laurea-laureadu. Metung pa gagamitan da la mu reng pera ra't sicanan queng bie ba lang mapiling laureadu. Queng malaguang sabi, sasali lang carangalan, sasaliuan de ing lugal da queng casalesaian—ing e ra balu atin pipilan a ipalto ra iting catutuan at metung na cu careta. Dacal la reng danupan queng bangsa tamu, at e lingad deng careng pamantasan dugu malalam la naman caplas atian pauli na nining daramdaman dang danup ania ditac mu rugung abias tatangu la carening talasulat a gagamit pera ba lang masabing baiani't ba lang midinan bulung laurel a ipecat da careng carelang malingmingan. Maragul a casiran (corruption) ining maliliaring iti. Ala pa naman ambusqui rugung metung carening talasulat ing manampi't tatapic careng caiabe na't sabian nang ustu na at dapat da nang tucnangan ining capamiraitnan a iti. Ala , uli'ng pata la ngan capanamdaman. Ania ala tamung abalung caiapan careng talasulat tamu't carening tau careng pamantasan a manamuiut carela. Bie asu ing maliliari queng calinangan tamu, ala iang pamialiua queng pulitica ta mu. Bie lasip, bie ulimau, singcatilus panchit (pantiit) at singcataram a ipan. Ala busqui metung man carening talasulat tamu (a alang marine papaiaus laureadu) ing alang daia ipan—ila ngan quininis la't tinacman laman at daia ning balaian a dapat sanang carelang ituru queng caiapan ba lang micasala caisipan at micacabiasnan laban quening casiran (corruption) ning pulitica. Ing sana macasaup la queng pamagmulat careng tau, macapabaiat la pa't mamie alimbaua ning capamiraitnan at casiran, ala nang matinu queng balaian tamu. Queng panaun ning dulum, deng talasulat ila sa'ng pag-asa't aslag ning balaian, dapuat deng talasulat tamu maquiagnan la pa carening puliticung sisira't bubulag queng lalauigan tamu.

Caragdagan pa, ining pamamiling poeta laureadu, ali ia mu calaraman at capamiraitnan. Ining pamamutung carening laurea-laureadung ini ali ia mu palatanda ning quebaban beluan at casutilan. Ining laurel Capampangan ini ali ia mu casiran (corruption). Nung e ini tatalacad iang talamac a ulad quening quecatamung calinangan. Dening laurea-laureadung deni tatalacad lang mangering luctun a lalaclac quening quecatamung calinangan at calalalangan. Metung iang malating pulitica. Ngana ning metung carening laureadu, pepaltauan nang tutu canung queng aldo-aldo bie ning tau dapat atin pulitica. Pepalto nang queng paniulat Capampangan (calupa ning pulitica tamu) ing maulaga nung ninu ing "caquilala." Ania reng e biasa queng pulitica, ngana, angga mu quetang malacuan la't macalinguan. Eminan nang pasicnangan queng calinangan ampong paniulat Capampangan. Eminan na ing tune rang daraptan. Buri nang sabian nining metung careng laurea-laureadu, deta mung biasa queng pulitica (deng atin caquilala, atin tegauan at pera) ilang manicuang galal a laurea-laureadu. Tiran neng tiran queng sinabi nang ini, uli'ng ining pamamili queng poeta laureadu ra, ala iang pamicaialiua queng alalan a marinat pa't mabangue queng pitaclan da. Inamin na't pepalto calaraman ngan ining diquil queng laurea-laureadung ini. Pisali ne't singo nining queang queclacan buntuc. Balana masanting ia ining sinabi, ali na balu pala, ia ing lasun at papaltutu quening carelang cabulastugan. Nanupata metung ia mu ing papaquit na: pulitica't capamiraitnan ining dapat dang pamamutung laurea-laureadu. Mete ne pu ing calinangan tamu!

Ining pamamutung laurea-laureadung ini gulu ia mung asnang dagul, gulu iang alang cabaldugan, gulu iang alang cararasnan masalese't masampat. Ining papamutung laurea-laureadung ini gulu iang palatanda ning pangalugmuc na queng carauacan nining quecatamung calinangan at iang sangcan ning queang maplas at mabilis a pangaiangu na bie. Magugulu la ngeni rening maiaiaus uatas tamu. At nanu pa ing asaan tamu nung e ining maragul a salut a idulut na't ibunga queng quecatamung calinangan at quening pamipate-pate ra't pamiuatac-uatac dening talasulat Capampangan. Asnang casala o't cacanian la't balamu rening asung mamulang a pisasamsaman de ining mabangnas a tinape. E la macasulat maselese, o mengare ining queng buntuc da't pusu ining nung macananu la ngan manicuang galal ampong nung macananu la ngan miputungan bulung laurel a apacat da careng carelang malingmingan. Dacal a sasaquit lub quening pisasabian a laurea-laureadung ini—lalu na pa canini potang matuldu la reng sinambut maguing laureadu at miligpit la rening mengasambut. Dacal a sasaquit lub—at mangapaburen ia ing paniulat Capampangan. Dacal la reng micacasucal pilubluban. Quetang aldo balacu mamurit ia rugu ining metung a uatas o poetisang ausan da. Dusuldit susulat ia canacu't maniauad iang atul uli canung asnang caracal ing cagarapalan quening pamamiling poeta laureadu. E mipapapatudtud at ala iang capaiapan queng pilubluban. Sinopan cu ne man dugu't dininan queng ditac a antabe. E cu balu nung pelalung ing pibale-bale na rugu iata mengapaburen—o mengare ing isipan na ining galal a laurea-laureadung panicuanan na. Cania-cania canu manuc carening poeta ampong balang nominadu atin iang tegauan o padrinu carening mialiuang aguman at tatalacad a mangatuang laurea-laureadu. Singcasican canu tegauan ngana. Casucal na lub, melunus cu quea. Cabira-bira abalu cung ini palang poetisang ini nominadu iang laurea-laureadu mu naman ania pala mamius ia't sasio a cania-cania manuc at marinat ing alalan da reng laurea-laureadu. O mengari misan dindam nang balana masasambut la queng alalan ning pangalaureadu. Balacu rugu maiataqui ia pusu't masira buntuc, uli'ng ala iang patugut susumbung canacu. Pepatunaian nang e ia masanting ining pamamutung laureadu at matiura ia pasari carening talasulat ampong queng cabilugan tamung paniulat Capampangan. E ne susulat canacu ngeni ining poetisang ini, balamu sasambut ne iata quening alalan da reng poeta laureadu, uli'ng pota guerantian ne nining tegauan na a gauan na ing anggang aguiu ra ba iang miputungan laurel. Ining poetisang ini binasa ne itang metung cung sinulat queng Ingglis a macapariquil mu naman quening laurea-laureadung ini, at mituran iang asna sican, ania memius ia't sinulat canacung nu canung susulat cu macapariquil quea, e cu na canu pacalino, casi canu adua la mu o atlu rening poetisa ra, ania balu re canung tambing nung ninu ing susulat cu't pamagsisti.

O ian magugulu la nung ninu reng dapat dang tulduan baiung laureadu! Dacal la carening nominadu't tatalacad a laurea-laureadu reng e mipaindatun at balamu reng e mipaling pusa carela. Sablang e ra balu deni ngan baiung nominadu na miputungan la ngan!

Ai, ua, miputungan la ngan laurel dening baiung nominadung laureadu—mabilug lang 28 canini dening poeta laureadu tamu. Itabac me man queng batu. Baquit, ngamo? O casi ba'ng alang sasaquit lub. Nung putungan mo reng adua carening anam a nominadung laureadu, ba mangulu la rening 4 a e miputungan, e no sumulat, ibagsac de ining quecatamung calinangan. Ania ing gauan da, ba'ng alang sasaquit lub, putungan da la ngan den! Opia! Opiang Apon! Tiran deng tiran. Ba'ng alang sasaquit lub carening nominadu, putungan la ngan laurel. Dinan la ngan maiumung pacabug! At nanu man ita, pilan la man dening pilinan dang baiung laureadu, e ne man milaco camarinaian ining galal at e ia luminis ining mangalauang a laurel. Pilan la man deng putungan da, ia mu naman ining bau't buluc na ning galal a ini. Pilan la man dening putungan da mangabaldugan ia pa mu rin a miragdagan na no na naman dening laureadu tamu—ibat la queng 22 laureadu, maging lang miguit queng 22. Sasaia! Piesta! Daracal la reng quecatamung "Kenkoy." Ngana pin nining cacaluguran cung talasulat queng Capampangan (a e macaquiabe't sariang lalaut carening laurea-laureadung deni uli'ng picarine na la), ngana, e ra la mu canu pala gueuang tia-tidua beinti singcu reng laureadu, nung e gueua ro pang tia-mamera ulaga!

Metung naman carening ausan dang poetisa pequisabian que (atlu la mu naman o apat dening poetisa rang deni—at itang metung carela misan sinulat ia canacu na panupaia que canu't e ia taganang macaing biasang Capampangan at baiu-baiu ia pang susulat, dapuat papaquit na nang bisa iang tagal poeta laureadu careng daratang a panaun)—o mequisabi cu pin maiap canining metung a poetisang ini, na nung caluguran ne pa ining calinangan tamu at quiquilalanan ne pa ining macatau't macabalen a panlalaue quening calinangan tamu, tangguian neng anting matinung tau ining babie ra queang laurea-laureadu at sabian na careng caiabe nang baiuan da't alilan ining mapulitica't laun dang paralan queng pamipuc at pamagmasusi queng quecatamung calinangan. Cabira-bira mibua ia't milablab queng sinabi cu quea. Pequibat na canacu, gauan cu canu ing nanu man gagauan cu at ia gauan na canu ing queang sablang gagauan at alang macasabat quea quening balac nang cunan ne ining galal a laurea-laureadu, uli canung ia mu ini ing sangcan o ba't megsamula iang sinulat at gauan na ngan ing balu nang gauan ba ne mung acua ining galal a laurea-laureadung ini. Melunus cu pa queng sarili cu't linto anti cu mong alang sinabi't inatul quea, linto cu pang mulala. Mengapilitan caming mipaglaco carening "cacaluguran" mi queng Facebook uli'ng ali que maliaring mipanantabe carening sangcan o ba't susulat cami. Ia galal ampong laurel ing tatagal na at ala iang paquialam queng pamibaba na't pamituag ning cabiasnan at calinangan Capampangan. Acua ne mu sa ing galal sapat na ing pigpauasan na queng pamaniulat.

Metung pa ining taung e na macatucnang queng bangsang Capampangan (queng lalauigan ning Pampanga at careng balaian queng Pilipinas a Capampangan matuturing) e ia dapat mitulduan bilang poeta laureadu. Ining poeta laureadu ning Capampangan, dapat mung macatucnang ia queng bangsang Capampangan. Mengare dapat iang macalapit carening taung queang susuiuan. Ua tutu atin nang internet ngeni dapuat e na buring sabian a sumuiu ne mu ining laureadu capamilatan ning internet. At ninu man ining mitulduan a maguing laureadu at binalac iang lumual Pilipinas, dapat neng itabili't lacuan ining catungculan na bilang laureado. Oneng ali, dening laureadu tamu mangacualta la ngan atiu careng mangacualtang bangsa at deng laureadung mitutuldu queng Pilipinas e la aliua carela, carela naman matuturing a pulacus da. Maragul a casiran ini queng cabiasnan Capampangan. Nung babatingan me ing bangsang Capampangan at Pilipinas, lulual cang tutulac palaut, dapat lacuan me ining catungculan a ini careng manatili queng bangsang Capampangan at Pilipinas. Mamili ca, ining caburian mu't pamangailangan munta't tucnang queng aliuang bangsa o manatili queng bangsa mu't daptan mu ing catungculan mu bilang laureadu. E mu ngan acua ing anggang linamnam, e macatuliran ita. Ngeni nung mibalic cang, mirinan cang casulatan a magpatune a eca tinucnang guinusal queng amanu't Capampangan angguiang macalaut ca, at lauan da nung carapat-dapat ca pang manungculan bilang laureadu. Dapuat cabang manatili ca aliuang bangsa, e ca carapat-dapat mirinan catungculan bilang laureadu. O't e ra isipan ini? O't alang minisip canini? E na ca cabud magtatata-tata't magbabiasa capamilatan ning internet. Nu ca pa anti cabiasnan, nung macalaut ca careng taung susuiuan mu, alang dulut at bunga ining anggang suiu mu't lugud. Pangaragul a maclac a buntuc careng laureadung dene! At nanung sangcan at mangailangan tamung laureadu? Nung taganang cailangan ta ia ining laureadu, e pa uari sapat ing metung a lauredu, o't pacaracal dong macanini? Ngeni nung dacal la rening sasio (at balu tamu sumio la't guleuc) uli'ng aliua ila reng miputungan laureadu, ba masanting nang ala na pang bitasang mipuputungan laureadu. Uli'ng ini macasira ia queng lipunan tamu't calinangan, mangabaldugan ia mung gulu, calupa ning gulung cacalucu ngeni careng balang metung carening 28 tamung macatalacad laurea-laureadu.

Ngeni naman ining metung carening ma-ue-ueng laureadu tamu, ngana, e bali canung maguing lang libu (1,000) dening laureadu, nung ila naman icaligtas ning amanung Capampangan, sulung putungan la ngan canung laureadu dening uatas tamu. O ma-ue-ue, e na balu ing pamaniabian na't daraptan. E na balung munang-muna ala ta pang uatas taganang masasabi, ania ala ta pang aputungan. Cacadua, busqui capilan queng bie tamu e ta isipan ining cauatasan aligtas ne ing metung a mamamate amanu (sangcan da na ita rening laurea-laureadu ba lang matunggue baiani't daquila). Ala iang sican ing cauatasan, tutu man, at macanian man iacu uatas cu naman, dapuat sasabian cung tapatan, ining cauatasan ala iang upaia't sican a iligtas ne ing metung a mamamate amanu. Maragul iang pamagcamali o camulalan ining isipan da reng laurea-laureadu tamung aligtas de ining mamamate tamung amanu capamilatan ning carelang cauatasan. Ali maliari ita capilan man, catatan mu cu man batal. Catlu, buri cu nang masabing atin tamu mapilan a poeta dapuat biasa la ngan, masanting ing paralan da queng balac dang pamagligtas queng amanu tamu at mangalalam la cauatasan at beluan. Quesa naman queng 28 lang laureadu ala naman quetunan-tunan. Ngeni pagmaragul na pang angguian pa canung libu (1,000) la. Buri cu ne ining metung matni buntuc a tune uatas iang magligtas quening amanu tamu, quesa careng libung Kenkoy o bobu a alang balung gauan nung e ing paparac ampong gueguegue. Camarinaian a maragul ini, tutu man. Dapuat ing casalesaian ipaquit na ngan ian, saguli namu. Balang tutungguen do laguiu queng casalesaian deng laurea-laureadung deni, maragul a camarinaian ing tataid careng pangatau ra't laguiu—at iacu bilang uatas Capampangan metung cu careng maniualang maliari ining caparusan at atul a ini carening 28 poeta laureadung deni (o careng 1,000 laurea-laureadung balac dang putungan careng daratang pang panaun) at cailian no ning casalesaian deni. Tutu man.

Atin pang metung carening mangaiap tamung laurea-laureadu, o't dugu papalto na pa'ng utang lub da reng Capampangan ing carelang pamaniulat? Papautang nang lub careng Capampanga ing gagauan na bilang maiaiaus uatas! Ala no canung baiad at ilaco re pa carela ining laurel a paninapan dang acua, o nanu na canu ing saia ra't tula ? Ua pin naman, mamie no rugung pera quening metung a pamantasan a mang-utu at manasag carela quening cabalbalan da, ania ing sisinguila da rening memalen Capampangan: at ing buri nang sabian dapat la uaring quilalanan baiani, daquila, matas at pecatanan la ngan laurel queng malingmingan da. O't nung e la pala taus lub susulat at gugusal queng icasaplala ning quecatamung calinangan, at papautang dang lub careng tau, sana dapat e no susulat at e no gugusal. Anac ning mabulbul catulpo, o't macanini? Ngeni icatamung Capampangan atin ta pang utang a lub carening laurea-laureadu tamu, uli'ng migagastus nong mamie pera queng metung a pamantasan, susulat na la (samantalang e no ma pin dapat sumulat), potang cai ala la pang acuang papuri, galal ampong laurel. Ua pin naman. Ania pala dusuldit mumuli la (uling pacatucnang la queracalan careng masasabing mangacualtang bangsa—ania atin lang perang pang-utu ampong maniulsul) dapat lang saganan at tanggapan anting baiani't daquila. Luid! Luid!

Deni naman careng pamantasan tamu, miririnan da la rugung pera't sasali rong pamangan careng mangasanting a restoran, papautu no man dugu carening laurea-laureadung deni a pacatucnang aliuang bangsa. Guinu cu po, casiri ra danup dening atiu quecatamo. Curucan da la mu rening laurea-laureadung balamu politicung sasaling botu, oreni datang no man dugung tangu-tangu't aili-aili. Mengari balu rang mibuburanan lang calam at gracia. Atin cu pang iquit pepalto na pa rugu ing danup na—macaletratu iang caiabe no reng laurea-laureadu at susubu iang saguin, nanamnaman ne rugu't paquipilasan ining saguin a seli ra quea quening metung a restoran—danup na, timan-timan ia pa mo. Quelat ing cacuracutan at capamiraitnan quecatamu. At ini dulut na ning danup, at ining danup naman mamunga iang cacuracutan at capamiraitnan, ania dudurut ia mu ing parugang at metung ia darasan—ing pangabagsac at pangasira ning cabiasnan at catinuan quecatamu. Macalungcut.

Dening baiung caianacan a e pa maiamuiut at miasag queng cabalbalan da rening laurea-laureadung deni, samasnan iu at e co paigut careni. Manatili caiu't talacad matatag nung nucarin co man ngeni, uli'ng maragul a camarinaian ing dugpa quecaiu nung tuqui co carening laurea-laureadung deni. Ining quelan dang marine, ining quepalan ning lupa re rening laurea-laureadung deni, ini ing ulad a ngatngat queng cabilian da't ia ing icatuag da. Milasa la balat queng casalesaian deni. Ining dapat da rening laurea-laureadung deni iang maguing sangcan ning carelang pangalasac. Mag-uagui ia't magluid ing baiung caisipan a tatalnan tamu. Magtagumpe ia ing macabaiung panugali at paralan. Magtagumpe ia ing baiung pamisip. Magtagumpe ia ing baiung paniulat Capampangan. Icatamung macabaiung talasulat balu ta'ng dening galal, pamaniambut carening ligligan ampong ing bulung laurel careng malingmingan ali la patune ning cabiasnan. Dening susulat tamu ilang sasabi nung nanu ta'ng uring talasulat. Balu ra ngan deng mangaiap a talasulat at uatas ini, at ini catutuan iang bibilug queng macabaiung caisipan at macabaiung paniulat Capampangan.


[About the author. Papa Osmubal is Oscar Balajadia of Magalang (Well, don't get fooled by that name), now a Macau resident (Sorry, where?) and married to a Chinese local (How? How come? Why?). He has been a Catholic seminarian (OK, he once opened a book at an exam in Latin and Romance Languages—but who in frigging hell did not?), a Catholic missionary (Oh, the rosary is the answer to our country's economic problems and to your alcoholism and addiction to nicotine!), a bookstore staffer (Yes, sir, listen here, we know it is urgent, so your book is on its way from Guangzhou and will be here in 8 months!), a librarian (Oh, it's Friday the 13th and I am not putting 666 as Dewey call number on this bloody book!), and a teaching assistant (OK, pal, I know you prepared for the exams so I will check and mark them!). He is currently a teacher (yawn) and has an M.A. in English Studies (yawn even more, nod off, and then snore) from the University of Macau (sorry again, where?).]

-Posted: 7:41 AM 7/19/10 | More of this author on eK!
Nextnext