eK! is electronic Kabalen, a web-exclusive Kapampangan journal of ideas

jason paul c. laxamana
jason paul c laxamana DOC, ATIN kung problema. E ku siguradu nung problema ya talaga, dapot pakiramdaman yu na' rin ing isaingsing ku.

Kasi makanini: e ku máka-miss tau-detang taung nung lalon mu dapat malapit kanaku. Aliwa aku ing klasi ning taung pápalual amanung e ku naman tune pánamdaman, inya misan man king biye ku ala kung sebianan, "Oy, a-miss da ka," potang akit keng pasibayu kaibat ning malambat a panaun. Bakit? Kasi, e ku ne man a-miss.

Inya oyni ing kakung kutang: Patye sasabian da ring taung ami-miss o a-miss da ka, tutu kaya ita, o ngada mu kanita bang kulayan lakuas makule ing kekong pamikaluguran, i.e., bang magpa-cute?

Ing ibpa ku kaluat na nang meko papuntang Amerika para magobra bilang caregiver. Nung kutnan mu ku nung ami-miss ke, ali. Nanu, sálunan ku kanini? O e ke mu ami-miss kasi e na ke man talaga makaying mabása king balang metung, ali? A wa.

O makananu no man ding kaluguran ku high school a meging kung kabása? Potang akakit da ku, tambing dang sasambitla ing a-miss da ku. Titiman ku mu. E ku mamablas, "Ay, a-miss da ka' rin." Sangkan: E tutu. Wa, dakal ke gewang kamuritan kanitang high school-mánisting mestra, overnight karing resort-oneng oyni ing detalying e mu kakalinguan. Ing ami-miss ku, detang panaun a deta, retang daraptan mi, aliwa ila mismu.

Doc, pabusten yung imasala kung ding sasabian kung e ku ami-miss, tau la. Homo sapiens. Inyang kematen kung metung a kuâ, i Doggard (a meyangu biye kaibat nang mekapangan goldfish a biniye nitang diablus ming kayabe), malua-lua ku. Pabulan kung malungkut king kayiyisip king pangamate na. Agaganaka kung parati itang migigising kung maranun neng abak para makipulayian kaya. Ing kayang bulbul a kule laman (flesh) at maputi. Ing pamanukyat na king kakung puad patye lulukluk ku karing luklukan kilual. I Doggard.

E yu asabing ing ami-miss ku iya pin ing panga-atin kung asung apapakialungan ku, kesa king i Doggard mismu. Kasi atin ku pang aduang kuâ kanita e. Kakialung ku la' naman abak-abak, oneng aliwa pa rin ing ala yu i Doggard.

Pisabian ta mu rin ing kamatayan. Mipalyaring sabian yung pilmi kong a-miss ding tau patye mete na la, kasi e no kapilan man mayakit keti yatu at meto sikluban.

Bali makatud ku nung sabian kung e ko ami-miss ding tau wangis nang ibpa ku at kaluguran high school kasi balu kung atiu la pa kening yatu? Kening "marangle ring mabiye"? Keganaganang malapit kaku, mabiye la pa't papaldak. Nung atin mang mate (katuk king dutung), págtakan ku: a-miss ke kaya?

Pero balu yu, Doc? Ambuski pa e yu na ku sasaupan, apiyisip-isip ku. Makalungkut ing atin kang ami-miss taung pákamalan mu, ali? Masuerti ku kasi ala kung makanitang kagiwan. Uling nung atin ku, mipalyaring aku na ing pekamalungkut a taung mabiye keti babo masala!

See you, Doc!


[About the author. Jason Paul C. Laxamana, 20, is producer of RocKapampangan, an album of Kapampangan songs remade by local rock bands to allow Kapampangan to penetrate the consciousness of the urban Kapampangan youth. He is an independent cultural worker seeking to empower Kapampangan by bringing it (and attempt to make it dominant) in pop culture. He operates an English-Kapampangan blogzine "The Prodigal Kamaru" at http://kamaru.blogspot.com, and a blog for his Kapampangan literary works "Kulang King Yumu" at http://sisigman.blogspot.com.]

-Posted: 11:01 PM 2/8/08 | More of this author on eK!
Nextnext