eK! is electronic Kabalen, a web-exclusive Kapampangan journal of ideas

wilfrido david
wilfrido david BIASA KANG mangaPampangan? Siyempre! Agiang nu ka pa karin, nung ing gagamitan mung salita keng pamibalebale mu emu maliaring akalinguan ing sariling mung amanu. Imposible! Oyta mu pin, dakal na samut in lulual king asbuk mu: Kastila, Inglis, at aliwa pa. Pero ing importante, ya pa mu rin ing gagamitan mu angga keng mate ka. Lawen mu, pilan pamung sentence ing sinabi ko, ginamit nakung Kastila ampong Inglis: "imposible," pronounced as is (magleletra), uling eke balu ing kapante na keng Kapampangan. Nun emu "e maliari" (ustu ko?) ampong "siyempre" (wa pin?). E kia naman balu ing katumbas (a Tagalog word?) na king salita tamu.

Obat mo reng aliwang turista o magbisita mu king America, pamagbalik da Pilipinas, magbalidbaliran la? Aku, mag-atlungpulu nakung banua keni America, mangaPampangan ku pa mu rin. Ing metung a sangkan obat eku magpadalang artikulo keng eksite.com king Kapampangan, uling kimo ko keng salita tamu, lalu na keng grammar, syntax, and spelling. Ing kakung Kapampangan is pure, everyday, conversational, with the accent intact. Eku misane susulat keng Kapampangan uli na ning Inglis ing gagamitan tamu manibat king kinder anggang college. Deng titser, agiang balubaluktut mu naman ing English da, reng aliwa sisigi la pa murin uling yang requirement king iskuwela. Nanu pa ta, maragul mu naman saup ing English mode of instruction uling yang "universal languange." Buri kung sabian, nung eka biasang magInglis o eka ka matinung magInglis, medyu disadvantaged ka agiang nu ka pa munta. Aintindian ku ing frustration da reng kekatamung advocates para keng Amanung Sisuan, a keng paglalawe ku a metung yang crusada ngeni. Pero uli na ning reality of the times, balamu ata kailangan tayang ilapit kareng kekatamung representante king gobierno tamu para gawang bill anti mo ing Reproductive Health Bill, a kamumurit nang Pres. Noynoy ngeni. (Pardon my ignorance, but has a bill of this sort ever been filed as yet—about the use of Kapampangan as the mode of instruction in grade school?)

Obat sasabian da, deng kanung Kapampangan mainge la, matarling, or masikan a bosis (suwala?) giang nuka karin. Balamu ata atin katutuan ini. Misan atiu ku ketang maragul a shopping mall king Daly City king California, megulat ku at metula niang damdaman kong mipagkuentu retang mikakaluguran o mikakamaganak king Jollibee. Talagang ala lang pakialam kareng kasiping dang lamesang kalupang Pinoy o Amerikano. Eku apibata lepitan kula at megpakilala ku, na taga-Angeles ku at bayung datang king America, megbisita keng pisan ku bayu munta Albuquerque. Biniru ku la, sabi ku, emu alingad ing Kapampangan la uling biasa lang mag-enjoy agiang nukarin la! Aba, mekumbira ku pang paugtuan at apunan kaibat. Biru mo?!

Keni Albuquerque, nung nuku makatuknang ngeni, ditak la reng Kapampangan. Abilang mula kareng taliri mu, ara pin. Keraklan mangatua la, dinatang la keni iniang early fifties uling da reng asawa rang Amerkanu. Atin mu naman kasing air force base keni (Kirtland AB) a kasindagul ning dating Clark Air Force Base. Siyempre, deng malapit kakaluguran Kapampangan la naman. Pero mikakit kami mu ustung atin party o kaya ustung atin mahjong session. Uling marayu kami king California, nung nula karin deng dakal a Pilipinu, ala keng Pilipinu restaurants agiang atin pang oriental store keni. Sabik kami keng pamangan Kapampangan, lalu na keng mayumu (leche flan, kakanin, kalame, halo-halo). Alang Barrio Fiesta, Kabalen, Max's, Everybody's Cafe—at alang sisig nang atcheng Lucing. Ken mung paninap mi. Inia ustung makumbira kami Kapampangan party eke mag-absent. Mayap namu, biasa ku at mailig maglutu. Pero matamad ku, puwera keng ena buri ning asawa ing lutu ko, buri na pa ing piniritung Spam o gisang sardinas.

Ninung magchismis ken, na deng kanung lalaking Kapampangan matamad o batugan la. Pero ustung miblas la plantsado ing susulud da, pati buak magpabanglu anti mong babae. Mayabang la at paratut (what's the difference?). Sugarol, palikero, at babaero (makalunus no rugo deng lalakeng Kapampangan—patodos at alang katutuan ini, agia pang dacal a sasabi na atin ku kanung kapatad keng lual!).

Maniwala kung kabalitan tamu keng kabiasnan keng kusina keng mabilug a yatu. Agiang nu ka munta keng Pilipinas, deng paintunan da alang aliwa nunge reng Kapampangan restaurant. Sabi da reng makatuwa, pasalamat tala reng ninunu tamong Kastila—keraklan na ning lutu tamung menibatan king Espanya, anti mo ing pochero, metsado, estofado, o kaldereta (ulaan kumu), puwera ing tidtad (dinuguan), buru, sisig, o kilawin.

Y apu ku (pisan neng pangaladuang Rogelio de la Rosa) asneng kalagu. Mestisain ya. Ing kutang ku, obat kabalitan la naman deng babaeng Kapampangan keng kalaguan da? (Ena man siguro patodos iti—dacal la naman deng matsura. Pero basta biasa lang maglutu, okey mu, ne?!)

Ustung babasan ko reng susulat da keng eksite.com a Kapampangan balamu mamasa kung textbook. Keraklan malalam, anti mo ing poesia. Kailangan kung magsane uling dakal ku kabolangan keng sarili tamung amanu. Anti mu rin, "I am proud to be a Filipino, but for being Kampampangan first and foremost." Nung maliari mu, mukyat ku king Empire State Building king Manhattan, gulisak kung "Kapampangan kuuuu, Kapampangan kuuuu . . . !" Pero marayu ing New York at mal ing pasaje ngeni.

Ustung buri dakung biruan deng kaluguran kung a e Kapampangan, ala lang balung sabian nunge, "Buri kung maglalaw keka," o kaya, "Puta na, bingi pa," o kaya "Itlog pa lang naging ibon na." Pero ustung kumbiran ko mangan keng bale, ela magpaali! Asmo pamu karayu panibatan. Pero ustung fiestang balen, darala da la pati pamilya ra! Dacal na ku sinabi, balamu danupan naku. Maglutu ku pa mung almusal—tsokolateng marayuput (imitation Spanish chocolate like my grandmother used to make), si'ngle nasi a dacal a bawang, Pampanga longganisa from the oriental store, piniritung stateside ebun. Bisa kung magpritong tuyo o tinapa, pero pota ireklamu raku deng siping kung bale—kaung nong kaung deng asu ra keng ababau ra!

Mamun na ku pu. Subukan kung magbalik.


[About the author. Wilfrido David first retired as Computer-Analyst from the Ayala Group of Companies. He immigrated to the US in 1985, worked there for another 25 years in the Medical Field (Medical Lab Tech), until he retired for the second time. Sometime ago, he was involved with FAANM (Filipino-American Association of New Mexico) as correspondent-contributor-writer-editor, publisher—all rolled into one. He says about that stint, "I ran out of energy, patience, and money but kept on with my duties until the next set of association officers were voted in." The earliest writing he did was for his high school paper in Holy Angel University. His present writing derives from the perspective of a Filipino expat in the US who faithfully keeps up with what's happening in the home country, as gleaned from his Filipino channels on DirecTV, aside from CNN and HLN.]

-Posted: 9:04 AM 4/28/11 | More of this author on eK!
Nextnext