eK! is electronic Kabalen, a web-exclusive Kapampangan journal of ideas

marcial tayag caniones
marcial tayag caniones MAINIS KU at ali aku ing menyambut P300,075,000.00 king lotto!

Karakal ku na pamo sa babalakan para ipanyaup karing tau. Mabubusit ku rin kang Lord, ot anggang misan mu ena ku pagbigyan.

Nung balu Na sa talaga ing planu ku!

Pengadi ku naman masinsinan na kapanyambut ku, pagawa ku langan deng masisirang pisamban keti Pampanga!

Kareng kalulu, sumaup kung mamye bubungan ampo simentu. Sumaup ku Gawad Kalinga!

Pagawa kung pabrikang gagawang pindang, longganisa!

Gawa ku rin pabrika para ilata ing burung talangka at ibalut lang masalese ring kending pastillas gawa Magalang!

Sali ku lang tricycle ding tambay kekami!

Dyan ku lang puhunan ding maglakung mirienda kekami!

Pagawa kung ospital para karing kalulu!

Mamye kung ambulansya karing 'gang barangay!

Panyali ku la ngan sakle ampo wheelchair ding pile ampo menga-stroke barangay mi!

Panyali ku lang salamin at paopera ku la katarata mata ring mangatwa!

Pagawa kung butika at pisaling mura ing panulu para karin mung kalulu!

Balang bakasyun da pamagaral ding lalaking kayanakan, libri tuli!

Dakal a bombang danum para karing makatuknang resettlement!

Balang bulan mamye kung apulung sakung abyas king orpaneyj ampo karing mangatwa!

Pakanan ku la balang Dumingu ring anak kalat-kalat keng dalan!

Ot e naman antindyan Lord ing masalese at mayap kung buring gawan? Marok ing buri ko? Ena ku man magbayu, nung makananu ku ugali kanita makanyan ku rin anngang manyambut kung milyun-milyun king lotto!

Sabi ku kang Lord, e ku no man solwan!

Maglele kumu para apayari ku lang college ding anak ku karing mangasanting a iskwela. Pagawa ke ing masisira ming alulud atsaka pagawa kung metung pang banyu king kwartu mi.

Nung sali ku man saken, metung mung brand new ing salwan ku! Sali kung "2nd hand" a mumurahin a saken para pang-aldoldong gamit panatad iskwela karing anak ku.

Ing asawa ku, sali keng gas range na atin oven. Nung bisa yang paparlor, sige!

Aku, maglele kumung para ditak paninum karing barkada, ditak a panyabung ampo mung pang VIP king karaoke. Ena man ciguru marok mamye bagyang kasiyan karing barkada. Balak ke rin saling wheelchair ing anak ng paring Ponsu a polio.

Matsura ing buri ko? Ali na man, ewari?! Ot ena antindyan Lord?

Linabas ku pisamban napun, ni e ke man buring lawen ing pisamban. Masakit ku pa lub kang Lord, kang Jesus! Ing ena na sana agawa keti yatu na sumaup Yang personal, aku na sana ing gampan! Kasu pin, ita ena antindyan!

Ene man siguru mua kaku, ala naku man gewang marok a marok para ena ku pagbigyan.

Mua ku Kaya! Mua ku king Babo! Wa! mua kung mua!

Pati magobra abroad, pekibalak ku pang sopan!

Manalakad kung "Padala" agency para karing padalang pasalubung 'bat abroad, pati padalang pera sakupan ku na. Manyingil ku mung murang halaga.

Mua kung mua!

Wa pin, mua ku!

Anggang mua ko pa kaku!

AKALINGWAN KUNG TINAYA?!

* Kumayud anggang mangisnawa. Nung ikang menyambut, king sobra tula, pota ika-stroke mu pa.


[About the author. Marcial Tayag Caniones, a Political Science graduate, is assistant manager at the Community Extension Services Office of Clark Development Corporation. He was born on the 10th of July, 42 years ago, became vegetarian 18 years ago, started serious reading 10 years ago, and began writing three years ago. He admits to being ugly but claims to ooze with sex appeal.]

-Posted: 8:13 AM 2/25/09 | More of this author on eK!
Nextnext