eK! is electronic Kabalen, a web-exclusive Kapampangan journal of ideas

marcial tayag caniones
marcial tayag caniones MIPANULAK KAMING gigigit keng gate "Jinggambel, jinggambel, jingel ol da wey / Orat pan dikisturayt en a wan orss ofen seyyy... eyyyy!" E Ronald panulak na kami king gate. Sasakyud ne in tud na karing bitis mi palapit karing siwang a bakal ning gate. Bigla neng kebugan ing yerung makataling alambri panakap ketang gate... Kablam!!!

Linwal yang pirapal pasbul da bale e Apung Romy at pemamaligwa neng leko tali at binulus ing asu nang maragul.

Apuuuu ko!...

Pulayan keng misalbag-salbag. Ing wali ku linundag ya king paligi. Ing murit a Ronald saugli mekaukyat ya ketang saresa. Makabitin yang balamu lilitsun kabang sasagakgak ya ing alti. Ding abe ming anak a mangalating babayi, migtaluku lang e gagalo at manggaga, ni eda rugung ikwang mipulayi uli king sobrang takut ampo nerbyus.

Sasagakgak ku rin maili kabang masosora ku kang alting Ronald.

Tinalwi mi ya kasi bale e Kang Romy. Makwalta la, tsa limang pesus kanu ing bibye na kari magkaroling anang Ronald. Atin lang mansanas makatanam arap dang bale. Malwat da neng sasabyan itang tanaman a ita reng makatwa kekami. Pota kanung pasku mamunga ya, a da. Ing pake mi talaga magkaroling at silipan pin nung mamunga ya itang tanaman a mansanas. Pilan nang banwa ni metung a bunga ala ke man bitasan ikit.

Meka P20 kami, anam lang bale dirutan mi. Pisabi-sabi mi kasi anyang abak kaybat ming migmaro na magkaroling kami. Bisa ke kasing minum Sarsi at saling metung suput a pandelemun. Kanita, asna na ke rugung kaswelu. Minum kaming Sarsi, babad mi pa king asbuk, kuminis malati ketang tinape, at mulmulan ming pisamut king asbuk para lambut ya ing pandelemun.

'Nyaman na kekami ita...

Ring aliwa ming siping baleng anak asnong yabang. E Frankie magobra ya tatang na "kilub," basta't lumwal ya bale da lalangut yang lalangut "Baby Rut." Ngeni, uling mag-Pasku, lagi yang atin perminanti, misan lima la pang dase tatalnan na. Awsan na kami at papagpilaan at pu'tut yang tsa limang makahilerang pakaba. Kabye na, sauglulu keng mantun nung nokarin atin simentu---madalas ketang tindahan kasi ita mu ing makasimentu king dalan mi. Mangalap ke kantang batung mabye para pamukpuk.

Agnan-agnan ke rin sisimba istung bengi reng kakyalung ku. E Ronald buri na king Pisamban maragul pa. 'E asnang kalaut, pero OK mu kekami kasi masaya ke laging maglakad, mipamusit at pulayan king dalan. Pakasambra ke kanita at mipanaya kami lele paligi king lalam na ning rilis tren. Paraparewu ke pa ngan e mengan kanita, uling kaybat ming sinimba siguradu mu magkaroling kami, at kalupa ning dati, Sarsi ampo pandelemun mipunta ing panakitan mi.

Keng kaming lual sisimba, e ke milub uli dakal tau. Marine ke rin uling pawasan at mangarusing na kami, atsaka e mi antindyan ing sasabyan ning pari. Muna, Inglis; kadwa, mumugung, mag-"echo"; katlu, bisa ke mu talagang mamasyal at magkaroling.

Asnang karimla kanta ing angin, manyalitsit king balugbug mi ampo king arung. Pota mipawas kaming maglakad, singka dakal ke pamo asuk ("mist") papalwal asbuk.

E Ronald anyang misan e tinuking migkaroling kekami. Sabi na munta ya pa kanu palengki. Atin ya kanung pasali e apu na. Kaya oyta, minuna na kami. Basta reng labasnan ming bale laganasan mi la ngan, likwan ne Ronald itang kayang "kalansing" a gewa na. Pekapili na la pa reng tansan. Buri na puro "Kok" (Coke) la reng tansan, swerti kanu ita para potang mamye lang pera reng bale-bale mas dakal. Kung Sarsi kanu o Pop, mas malati mu kanu ing bibye da.

Atsu ke king tindahan pasali na kaming Sarsi ampo pandelemun. Padatang yang atin abeng apat a mangatwang lalaki e Ronald. E mi la aitsuran uling makagulut lang palakad king masalang sulu king posti. Dineretsu la karela. Balu mi akakit na kaming Ronald tindahan, pero ni e na ke man pinaswit.

Sinunud kaming dadalan ing Sarsi ampo tinape king bale da ri Ronald, at megulisakan ke pa kang Mek-Mek, "Oyyy, reng boti kuuuu!"

Tinulak mi ya itang yeru dang malating gate. Agad neng sebat apu na, kaybat pemulyo na kami na mamaglako. "Mako ko keni, anakputa kayo! Pasari yu ngan ini," anang apu na.

Itang metung a matwang lalaki, telan na ku biglang gamat at sabi na, "Ini ing abe mo..." Asneng dagul bosis, matas ya at matuling.

Migtalpak ku king gabun, migkasatkasat at manggaga.

Pinulandit lang palwal ring kakyalung mi at inaus do ring apu mi. Aku e 'ma ku ing gugulisak kung awsan. Enaku tebili nitang lalaki.

Ing tarantadung, bolang a Ronald kasi, menako ya palang makalatang sausage, kesu ampo spageti ketang Tan's Mini-Mart.

Gaga-gaga ya pa mo ing murit at siguk-siguk ing dipanen! Tawu at kanan mi sana kanu potang mag-Krismas party ke kanu.

King takut kung makulung, asna kung kamwa lub kang Ronald ampo king matwang lalaking e bisang tabili king gamat ku!

Makanyan pala...

Eku kalingwan...

Na potang midame ka...

Na ala kang kamale-male...

Tatakut kang mangabarug kang tatang mu...

Isipan mu na makulung ka...

At balu mu e ne man talagang marok ing kakyalung mu...

Pakiramdam ku...

Bala mu pala, ala man talagang JISUZ...


[About the author. Marcial Tayag Caniones, a Political Science graduate, is assistant manager at the Community Extension Services Office of Clark Development Corporation. He was born on the 10th of July, 42 years ago, became vegetarian 18 years ago, started serious reading 10 years ago, and began writing three years ago. He admits to being ugly but claims to ooze with sex appeal.]

-Posted: 1:28 AM 12/24/08 | More of this author on eK!
Nextnext